COP28: Scholz ya gabatar da kokarin Jamus kan muhalli

Shugaban gwamnatin Jamus Olaf Scholz ya yi kira ga kasashen duniya su rubanya kokarin da suke a kokarin samar da makamashin da ake iya sabuntawa daga nan zuwa shekara ta 2030. Scholz ya fadi haka ne a yayin da yake jawabi a babban taron duniya kan sauyin yanayi, COP28 da ke gudana yanzu haka a kasar Hadaddiyar Daular Larabawa.

Baya ga shugaban gwamnatin Jamus sauran kasashen da suka yi jawabi a baya-bayan nan sun hada da Faransa da Amirka da kowanensu ya bayar da shawarwarin yadda yake ganin za a kara alkinta muhalli tare da shan alwashin yin duk mai yiwuwar wajen ganin an dakatar da tasirin sauyin yanayi da ke ci gaba da yi wa Mutum da Duniyarsa barazana.