Paparoma ya fara raha bayan tiiyatar hanji

Likitan da ya yi wa Paparoma Francis tiyata ya ce aikin gaggawa da aka yi masa a hanji a wani asibiti da ke Rome babban birnin kasar Italiya ya gudana ba tare da wata matsala ba. Shugaban darikar Katolika ta duniya ya shafe kusan sa'o'i uku ana yi masa tiyata, amma tuni ya fara raha, in ji jami'an kiwon lafiya.

Paparoma Francis mai shekaru 86 da haihuwa na fama da matsalar toshewar hanji da ta sa aka fara yi masa aiki watanni 11 da suka gabata. Tuni ma fadar Vatican ta soke duk wasu tafiye- tafiye da manyan ayyukan ibada da Paparoma ya kamata ya yi har zuwa 18 ga Yuni.